Nxënësit do të kthehen në shkollë para 13 shtatorit për mësim plotësues

Nxënësit e sistemit parauniversitar do rikthehen në shkollë para datës 13 shtator. Ministrja e Arsimit, Evis Kushi ka bërë të ditur se dy javë para nisjes së vitit të ri shkollor, nxënësit do zhvillojnë mësim plotësues.

“Ne kemi vendosur që për vitin e ardhshëm shkollor, në javët e para do të kemi mësim plotësues në të gjitha shkollat tona. Do të jetë një plan fleksibel në varësi të nevojave që ka çdo shkollë, apo çdo zonë”, u shpreh ministrja Kushi

Pushimet për nxënësit do të mbyllen më shpejt pasi gjatë vitit të kaluar shkollor sipas ministres ka pasur mangësi në njohuri për shkak të mësimit herë online dhe herë në shkollë.

“Jemi të vetëdijshëm që ka pasur edhe mangësi në njohuri apo kompetenca të nxënësve. Për këtë arsye, në muajt e fundit kemi punuar intensivisht për të hartuar një strategji se si t’i plotësojmë këto mangësi”, deklaroi ministrja.

Kushi sqaroi se fillimi i shkollës dy javë para datës zyrtare, pra më 30 gusht përkon me ndryshimet e mëdha që po ndodhin në sektorin e arsimit, për të cilin sipas saj duhet të përgatiten në mënyrën më të mirë të mundshme edhe mësuesit.

LEXONI GJITHASHTU:

• Ministria e Arsimit nxjerr urdhrin, gjuha angleze pritet të fillojë nga klasa e parë
• Rigels Xhemollari: Arsimi ka nevojë për reformim, t’u lihet zgjedhje e lirë universiteteve