OBSH: 1 në 3 gra në mbarë botën kanë përjetuar dhunë në familje ose dhunë seksuale

Sipas një raporti të Organizatës Botërore të Shëndetësisë një në tre gra ose rreth 840 milionë në mbarë botën kanë përjetuar dhunë në familje ose seksuale në një moment të jetës së tyre. Më tej OBSH shtoi se dhuna ndaj grave mbetet një nga krizat më të vazhdueshme të të drejtave të njeriut në botë, me shumë pak përparim të bërë në dy dekada.

Sipas raportit, vetëm në 12 muajt e fundit, 316 milionë gra ose 11% e grave të moshës 15 vjeç e lart kanë përjetuar dhunë nga një partner intim. Për herë të parë, raporti përfshin vlerësime të dhunës seksuale të kryer nga dikush tjetër përveç partnerit të një gruaje, duke zbuluar se 263 milionë gra kanë përjetuar dhunë seksuale nga një palë e tretë që nga mosha 15 vjeç.

Ekspertët besojnë se ky numër është ende i nënvlerësuar pasi dhuna raportohet kryesisht për shkak të “stigmës dhe frikës”. Ky raport i ri është publikuar përpara Ditës Ndërkombëtare për Eliminimin e Dhunës ndaj Grave dhe Vajzave më 25 nëntor. Raporti gjithashtu thekson se dhuna ndaj grave fillon herët dhe se rreziqet vazhdojnë gjatë gjithë jetës së tyre.

Dhuna ekziston kudo, gratë që jetojnë në vendet më pak të zhvilluara, zonat e konfliktit dhe zonat e ndjeshme ndaj ndryshimeve klimatike preken në mënyrë disproporcionale. Oqeania duke përjashtuar Australinë dhe Zelandën e Re regjistroi një shkallë prej 38% të dhunës në familje vitin e kaluar, më shumë se tre herë mesataren globale prej 11% dhe dukshëm më të lartë se normat përkatëse në Azinë Jugore (19%) ose Afrikën Sub-Sahariane (17%). Amerika Latine dhe Karaibet (7%) dhe Evropa dhe Amerika e Veriut (5%) kanë normat më të ulëta të dhunës në familje.

LEXONI GJITHASHTU:

• Bisedimet në Stamboll për Ukrainën, çfarë qëndrimi mban Erdogan
• Musk dhe Nvidia do të ndërtojnë një qendër të madhe të dhënash në Arabinë Saudite