Oerd Bylykbashi thotë se hetimi i zgjedhjeve të 25 prillit do të sprovojë SPAK-un

Oerd Bylykbashi, anëtari i Kryesisë së Partisë Demokratike, tha në studion e Euronews Albania përballë gazetarëve Ilva Tare, Mentor Kikia dhe Edlira Gjoni se hetimi i krimeve zgjedhore të 25 prillit “do jetë një sprovë e madhe për SPAK-un”.

“Këto zgjedhje do të jenë test i madh për SPAK-un, provat janë aty, kallëzimet kanë prova dhe flasim për atë që kanë parë shqiptarët,” – u shpreh Bylykbashi duke treguar se në përgjithësi janë 180 kallëzime të dërguara në prokurori, prej së cilat 50 i janë dërguar SPAK-ut.

“[…] ne në KQZ po kërkojmë pavlefshmërinë e zgjedhjeve, jo për numërim gabim, apo keq-numërim me dashje, por pavlefshmëria është për ato lloj shkeljesh të parikuperueshme më, si cenimi i sekretit të votës, lirisë së votës përmes përdorimit të burimeve shtetërore,” – vijoi Bylykbashi.

Duke analizuar në tërësi zgjedhjet e 25 prillit, deputeti i zgjedhur në qarkun e Durrësit tha se sistemi zgjedhor, për nga ndryshimet që u bënë, “nuk ishte i ndershëm”. Ai u shpreh se me ndryshimin e sistemit “PS mori 5 mandate më tepër”.

Më tej Bylykbashi përdori një krahasim direkt për të theksuar pretendimet që ka PD për pavlefshmërinë e zgjedhjeve në të paktën 9 qarqe.

“Shitblerja e votës nga bandat është si ato krimet që kryejnë grupet paramilitare, shumë të shëmtuara, por dëmi s’është masiv, por të futet shteti në lojë me të gjithë mekanizmin e vetë, është sikur të futet ushtria dhe të bëjë masakër,” – krahasoi Bylykbashi.