Opozita në Kosovë e cilëson dështim të plotë qëndrimin e Kurtit përballë Vuçiç-it

Opozita në Kosovë e cilëson dështim të plotë, qëndrimin e kryeministrit Albin Kurti në Bruksel përballë presidentit serb, Aleksandër Vuçiç.

Ish-kryeministri Ramush Haradinaj deklaroi se përbën habi, fakti që për kreun e qeverisë së Kosovës, prioritet nuk është njohja nga Serbia.

Për Ramush Haradinajn çdo qasje tjetër nuk jep rezultat dhe është e rrezikshme për vendin.

Ai i ka bërë thirrje Kurtit të paraqitet në Parlament dhe shprehet i gatshëm që AAK t’i paraqesë një dokument për pritshmëritë për dialogun, që sipas Haradinajt duhet të nisë me njohjen e ndërsjellët.

Sipas tij, propozimi i Kurtit që Kosova dhe Serbia të nënshkruajnë një marrëveshje të përbashkët të paqes duke u zotuar se nuk do ta sulmojnë njëra-tjetrën, është krejtësisht e panevojshme.

“Dihet se ne jemi përgjegjësi e NATO’s dhe nuk guxon të na sulmojë Serbia, dhe në çdo rrethanë duhet kërkuar njohja, pasi kështu vjen dhe anëtarësimi në NATO”,  thekson Haradinaj.

Ndërkaq për nënkryetarin e Lidhjes Demokratike të Kosovës, Lutfi Haziri, takimi i parë Kurti-Vuçiç, nuk kishte të bënte me negociata.

Haziri thotë se parimet e bisedimeve gjithnjë kanë qenë, dialog pa kushte dhe trajtim si të barabartë në tryezë, por katër kushtet e Kurtit janë përtej bisedimeve.

Ish-kryenegociatorja e Kosovës për dialogun Kosovë-Serbi, Edita Tahiri tha se kryeministri Albin Kurti, u tregua inferior karshi Vuçiç-it dhe se e ka dëmtuar Kosovën.

Madje, Tahiri shtoi se Kurti e ka vendosur Kosovën në pozitë të vështirë pas takimit të djeshëm.

Ajo thekson se Kurti, i cili ka qenë mjaft i ashpër kur ishte në opozitë, por u tregua shumë inferior dhe thjesht vendosi Serbinë në një pozitë më të mirë në dialog.

Gjatë takimit të djeshëm pati shumë tension dhe polemika mes Kurtit dhe Vuçiç-it, i cili deklaroi serish se nuk do ta njohë kurrë Kosovën.

LEXONI GJITHASHTU:

Vuçiç tregon momentet e tensionit gjatë takimit me Kurtin: Më provokoi

Ramush Haradinaj: Kurti po e fut dialogun me Serbinë në shtigje të rrezikshme për vendin

Pas takimit Kurti-Vuçiç, reagon i dërguari i BE-së, Miroslav Lajçak