Orban përballë Magyar, Hungaria mban zgjedhjet parlamentare më 12 prill

Zgjedhjet parlamentare në Hungari do të zhvillohen më 12 prill, me kryeministrin e vendit Viktor Orbán që pritet të përballet me sfidën e tij më të vështirë në 16 vjet.
Presidenti Tamás Sulyok njoftoi datën e zgjedhjeve të martën, duke i nxitur njerëzit të votojnë.

“Një nga gurët themeltarë të demokracisë është e drejta për të votuar lirisht”, shkroi ai në mediat sociale.

Njoftimi vjen në një kohë kur Orban dhe partia e tij nacionaliste-populiste Fidesz kanë mbetur prapa partisë opozitare Tisza, e drejtuar nga Peter Magyar. Në shumicën e sondazheve, shihet disavantazhi më i madh me të cilin është përballur kryeministri Orban që kur mori detyrën në vitin 2010.

Orban, udhëheqësi më jetëgjatë i Bashkimit Evropian, u rikthye në detyrë në vitin 2010, pasi shërbeu një mandat si kryeministër midis viteve 1998 dhe 2002.

Sipas tij, zgjedhjet më 12 prill do të jenë një zgjedhje midis luftës dhe paqes, duke pretenduar se Tisza nuk është gjë tjetër veçse një projekt i BE-së i sajuar në Bruksel për të rrëzuar qeverinë e tij dhe për të instaluar një regjim kukull që do t’i marrë financat e Hungarisë dhe madje do ta përfshijë atë drejtpërdrejt në konfliktin Ukrainë-Rusi.

Ndërkohë, Magyar është zotuar se nëse zgjidhet, do të marrë masa kundër korrupsionit dhe do të sjellë në Budapest miliarda euro nga fondet që BE-ja i ka ngrirë për shkak të shqetësimeve për pavarësinë e gjyqësorit dhe korrupsionin.