Pakistani i bindur, vijon përpjekjet për dialog mes SHBA-së dhe Iranit

Pakistani ka deklaruar se do të vazhdojë përpjekjet për të nxitur negociatat mes Shteteve të Bashkuara dhe Iranit, me qëllim përfundimin e konfliktit mes tyre, pavarësisht pranimit të “pengesave” në këtë proces.

Gjatë një konference për mediat në Islamabad, zëdhënësi i Ministrisë së Jashtme, Tahir Andrabi, nuk dha detaje konkrete mbi vështirësitë që po hasen, por theksoi angazhimin e vazhdueshëm të vendit të tij në lehtësimin e dialogut.

Deklaratat e tij erdhën vetëm disa orë pasi Presidenti i SHBA-së, Donald Trump, paralajmëroi Iranin me pasoja të rënda, duke kërcënuar me sulme nëse Teherani nuk pranon kushtet e Uashingtonit për një marrëveshje paqeje.

Pakistani ka marrë një rol udhëheqës në një përpjekje shumëkombëshe për të ndërmjetësuar mes dy vendeve, duke u përpjekur të krijojë kushte për negociata të qëndrueshme.

“Pavarësisht sfidave dhe pengesave, Pakistani do të vazhdojë përpjekjet e tij për të nxitur lehtësimin dhe dialogun”, u shpreh Andrabi, duke shtuar se si SHBA-të, ashtu edhe Irani, kanë shprehur besim në rolin e Pakistanit si një ndërmjetës neutral.