Panairi i Librit online, Petrit Ymeri: Këtë vit më shumë se 400 tituj të rinj librash

Petrit Ymeri, kryetar i Shoqatës së Botuesve Shqiptar, në një intervistë për Euronews Albania foli rreth Panairit të Librit që do të zhvillohet këtë vit i cili ka dalë prej traditës 23-vjeçare.

Nga zhvillimi i tij i zakonshëm në Pallatin e Kongreseve këtë vit për shkak të pandemisë kjo ngjarje do të zhvillohet online.

Panairi do të zgjasë 4 ditë dhe ditën e dielë, do të bëhet dhe vlerësimi për titujt më të mirë.

“Të gjitha këto aktivitete do të bëhen të njohura për lexuesin online jo vetëm nëpërmjet Facebook-ut të të gjitha shtëpive botuese por edhe nëpërmjet ekraneve të vendosura në disa pika të Tiranës, ekrane të mëdhenj që janë 24 orë  duke transmetuar aktivitetet, një pjesë e tyre live (direkt), disa të tjera meqenëse kemi dhe disa aktivitete në të njëjtën kohë do të transmetohen të regjistruara,” – u shpreh Ymeri.

Pyetur nga gazetarja Mulaj për prurjet e reja këtë vit, kryetari i Shoqatës së Botuesve Shqiptar pohoi se numri i titujve të rinj të librave kishte rënë në krahasim me një vit më parë.

“Janë më shumë se 400 tituj të rinj që janë botuar,” – tregoi z. Ymeri.

Ndër të tjera ai tha se pavarësisht dyshimit nëse kjo iniciativë do të përqafohej nga botuesit, ishte surprizuese mënyra se si e pritën organizimin online të Panairit të Librit.

Lexoni gjithashtu: 

Anulohet Panairi i Librit, Petrit Ymeri: Blerjet do të bëhen online