Pandemia Covid-19, tri viktima dhe 92 të shëruar në Kosovë

Situata e pandemisë Covid-19 vijon të jetë e qëndrueshme në Kosovë. Sipas Institutit të Shëndetësisë Publike në Kosovë, në 24 orët e fundit janë kryer 509 teste të dyshuara, nga të cilat 49 qytetarë janë identifikuar pozitivë, kurse tre pacientë kanë humbur jetën.

Gjithashtu, raportohet se në të gjithë vendin janë shëruar edhe 92 pacientë. Sipas të dhënave të fundit, të cilat janë bërë publike nga vetë IKSHPK-ja, thuhet se nga fillimi i pandemisë dhe deri sot 638 qytetarë kanë humbur jetën.

“Numri total i rasteve pozitive është 15.938 raste nga 71.865 persona të dyshimtë në virusin SARS-CoV-2 dhe 638 raste të vdekjes. Gjatë 24 orëve të fundit, janë shëruar 92 pacientë derisa numri i përgjithshëm i të shëruarve deri më sot është gjithsej 14.143 raste, kurse numri i rasteve aktive është 1.157”, njofton Instituti i Shëndetësisë.

Rastet pozitive në Kosovë:

Komuna Prishtinë 22 raste, komuna Gjakovë 5 raste, komuna Ferizaj 3 raste, komuna Klinë 3 raste, komuna Fushë Kosovë 2 raste, komuna Lipjan 2 raste, komuna Rahovec 2 raste dhe me nga një rast komunat Deçan, Dragash, Gjilan, Kaçanik, Malishevë, Pejë, Podujevë, Shtime, Skenderaj dhe Vushtrri.

Autoritetet shëndetësore ftojnë qytetarët të ruajnë distancën, të vendosin maskë dhe të shmangin frekuentimin e ambienteve, ku ka grumbullime masive të njerëzve.