Pandemia e Covid-19 sjell një sërë çrregullimesh, shtohet nervozizmi tek shqiptarët

Truri është organi më i sulmuar sot në trupin e njeriut. Në Shqipëri specialistët pohojnë se problemet e shëndetit mendor janë shtuar dhe shkak për këtë është edhe pandemia covid-19.

“Në qoftë se në krahasojmë një vit më parë me vitin që jemi tani edhe për shkak se çfarë po ndodh, patjetër që shifrat të paktën janë trefishuar. Mund të thoja sidomos këtë periudhën e fundit pas tërmetit dhe pandemisë, simptoma që ankohet më shumë është nervoziteti. Simptoma të tjera si rrahjet e shpeshta të zëmrës, vështirësitë në frymëmarrje, ndjenjat e trishtimit, melankolisë”, tha mjekja psikiatre, Arjana Rreli.

Rritja e numrit të personave të cilët vuajnë nga COVID-19 sipas neurokirurgu shqiptar në Madrit, Kita Sallabanda, po shton edhe shifrat e atyre që vuajnë nga probleme të shëndetit mendor.

“Ne po shohim se një muaj apo dy muaj pasi e kanë kaluar Covid-19, këta të sëmurë shprehin sidomos humbjen e memories, koncentrimit, nuk dinë të bëjnë llogaritë, nuk janë të përqendruar, harrojnë shumë shpejt, dhe në krahun tjetër, kemi venë re që janë të axhituar”, tha ai.

Të gjitha këto pasoja të COVID-19 mendohet që do ndikojnë në kualitetin e jetës së këtyre të sëmurëve.

“Këto do të ndikojnë në kapacitetin dhe në kualitetin e jetës së këtyre të sëmurëve, por nuk e dimë se çfarë do të ndodhë pas dy vjetësh. Mendojmë se tek moshat e mëdha nuk do ketë shenja përmirësimi të dukshme, por kjo është për t’u parë”, shtoi ai.

Të gjendur pa asnjë kurim për pas shqetësimet e coronavirus, ekspertët thonë se arma e vetme është bashkëpunimi me psikologët.