Pandemia kufizon lëvizjet, kufijtë gjysmë të hapur, në mars erdhën 394 mijë shtetas

Për shkak të pandemisë, lëvizjet e qytetarëve në të gjithë botën vijojnë të mbeten të kufizuara. Shumë shtete janë në regjimin e masave, të cilat forcohen ose lehtësohen sipas kurbës së infektimeve nga COVID-19. Këto masa, kanë ndikuar edhe në qarkullimin e  lirë të qytetarëve.

Kështu, gjatë muajit të kaluar në Shqipëri kanë hyrë 394 000 shtetas shqiptarë e të huaj, ose 45 % më shumë se marsi i vitit të kaluar, kur në vend u shpall karantina, por këto shifra janë larg nivelit të marsit 2019.

Fluks qarkullimi i ngjashëm vihet re edhe në krahun dalës, ku 413 mijë shtetas kanë kaluar kufijtë shqiptarë, por në krahasim me marsin e vitit 2019, lëvizjet flasin për reduktim të linjave të transportit ajror, tokësor e detar, por edhe rënie të kërkesave nga ana e qytetarëve.

Krahasuar me marsin e vitit 2020, nga Greqia, Anglia e Gjermania kanë mbërritur më pak shtetas, ndërsa në pikat kufitare që ndajnë Shqipërinë me Kosovën dhe Maqedoninë e Veriut, ka pasur fluks më të shtuar, përfshirë edhe mbërritjet nga Italia dhe Zvicra.

Pjesa më e madhe e qytetarëve deklaruan se vizituan Shqipërinë në mars për qëllime turistike, arsye shëndetësore dhe për të vizituar të afërmit, ndërsa 10 mijë prej tyre erdhën për qëllime biznesi.