Papa Leo bisedë telefonike me presidentin izraelit, Vatikani jep detaje nga diskutimet

Papa Leo këtë të premte ka zhvilluar një bisedë telefonike me presidentin izraelit, Isaac Herzog. Vatikani ka njoftuar se Papa i kërkoi Herzog që të rihapë të gjitha shtigjet e dialogut për t’i dhënë fund luftës në Iran.

Papa, i cili është shfaqur si një kritik i ashpër i konfliktit rajonal, i kërkoi gjithashtu Herzogut të mbrojë civilët dhe të promovojë respektin për të drejtën ndërkombëtare dhe humanitare.

Papa Leo XIV pak ditë më parë deklaroi se Zoti i refuzon lutjet e udhëheqësve që fillojnë luftëra dhe i njollosin duart me gjak. Kjo ishte një deklaratë jashtëzakonisht e ashpër ndërsa lufta në Iran vijon prej më shumë se një muaji.

Udhëheqësi katolik romak nuk përmendi ndonjë udhëheqës specifik botëror, por ai ka rritur kritikat e tij ndaj luftës në Iran në javët e fundit.

Papa ka bërë vazhdimisht thirrje për një armëpushim të menjëhershëm dhe tha javën e kaluar se sulmet ajrore dhe të llojeve të tjera duhet të ndalohen.