Paralajmërimi i Merz: Tarifat 30% të SHBA-së do ta godasin rëndë ekonominë gjermane

Kancelari Friedrich Merz paralajmëroi të dielën se ekonomia gjermane do të vuante pasoja të rënda nëse Presidenti i SHBA-së, Donald Trump, vazhdon me planin për të vendosur tarifa prej 30% për importet nga Bashkimi Evropian, duke hyrë në fuqi muajin e ardhshëm.

“Nëse kjo ndodh, ne mund të lëmë pas dore pjesë të mëdha të përpjekjeve tona të politikës ekonomike, sepse kjo do të errësonte gjithçka dhe do të godiste rëndë industrinë gjermane të eksportit,” tha Merz në një intervistë për transmetuesin publik ARD.

Kancelari bëri me dije se gjatë fundjavës ka zhvilluar bisedime me Presidentin francez Emmanuel Macron dhe Presidenten e Komisionit Evropian Ursula von der Leyen, me qëllim diskutimin e zhvillimeve të fundit.

Ai shprehu shpresën që evropianët të arrijnë një marrëveshje me administratën Trump para afatit të 1 gushtit, duke theksuar se për këtë kërkohet unitet brenda Bashkimit Evropian dhe një komunikim i arsyeshëm me Shtetet e Bashkuara.

Në lidhje me thirrjen e Presidentit francez për kundër-tarifa evropiane, Merz u shpreh: “Po, por jo para 1 gushtit,” duke sqaruar se këtë qasje e ka diskutuar edhe me Ursula von der Leyen dhe Macron.

Sipas tij, “Ne duam ta përdorim këtë kohë, dy javë e gjysmë deri më 1 gusht, për të gjetur një zgjidhje, dhe unë jam i përkushtuar për këtë.”

Pak ditë më parë, Presidenti amerikan Donald Trump kërcënoi se do të vendoste tarifa prej 30% për të gjitha mallrat e importuara nga BE-ja, duke filluar nga 1 gushti.

Në përgjigje, Presidentja e Komisionit Evropian Ursula von der Leyen bëri me dije se blloku preferon një zgjidhje të negociuar deri në atë datë dhe do të pezullojë kundërmasat deri në fillim të gushtit.

Ajo nënvizoi gjithashtu se Evropa është e përgatitur për “të gjitha skenarët e mundshëm”, por se “nuk jemi ende atje” dhe tani është koha për negociata.

LEXONI GJITHASHTU:

• Merz: Berlini i gatshëm të blejë sisteme mbrojtjeje ajrore Patriot për Ukrainën
• Merz: Izraeli po kryen “punën e ndyrë për të gjithë ne”