Parandalohet sulmi me bombë në një aeroport në Kaliforni, arrestohet 49-vjeçari

Një burrë që mbante një pajisje shpërthyese mjaftueshëm të fuqishme për të dëmtuar një avion, si dhe një çakmak, thikë, lidhëse plastike dhe sende të tjera, u arrestua pasi tentoi të kalonte nëpër një pikë kontrolli sigurie në Aeroportin Ndërkombëtar të Sakramentos, njoftuan prokurorët federalë.

49-vjeçari nga Sakramento kishte veshur një shall që i mbulonte fytyrën dhe doreza, tha Prokurori i SHBA-së, Eric Grant, në një deklaratë për mediat.

Ai kishte gjithashtu pesë telefona celularë. Njëri prej tyre kishte të aktivizuar një kohëmatës 15-minutësh, ndërsa në ekranin e një tjetri shfaqej një mesazh nga një numër tjetër telefoni ku shkruhej: “Do të presim telefonatën tuaj.”

Fotografitë e publikuara nga prokurorët treguan një tub kartoni me madhësinë e një ruli letre higjienike, i pajisur me fitil të gjelbër. Ekspertët e bombave e testuan pajisjen.

Sipas Grant, pluhuri dhe fitili “u përcaktuan si funksionalë dhe me potencial shpërthyes”.

Ai shtoi se nëse pajisja do të shpërthente pranë një dritareje të një avioni të presurizuar që fluturonte mbi 10 mijë metra lartësi, “ajo kishte potencialin të dëmtonte avionin dhe të shkaktonte humbje të mundshme të personave në kabinë.”

Përpara se pajisja të hiqej nga aeroporti, oficerët vendosën mbi të një batanije speciale për frenimin e valës së shpërthimit dhe izoluan zonën përreth, sipas padisë federale ndaj të dyshuarit.

Ai u arrestua të shtunën dhe doli para gjykatës federale në Sakramento të mërkurën.

49-vjeçari akuzohet për posedim të paligjshëm të materialeve shpërthyese në një aeroport. Ankesa federale pretendon gjithashtu se ai kishte bërë telefonata të paqarta dhe të çrregullta në FBI gjatë muajve të mëparshëm, duke raportuar se po kërcënohej dhe frikësohej.

Avokatja e tij mbrojtëse, Meghan McLoughlin, tha në një email për agjencinë Associated Press se “shpesh këto raste kanë më shumë sesa pretendimet e qeverisë dhe se procesi penal do të zbulojë edhe versionin e klientit të saj.”

Nuk dihet ende se sa i detajuar ishte kontrolli që iu bë burrit në pikën e kontrollit të Administratës së Sigurisë së Transportit (TSA).

Vitin e kaluar, udhëtarëve ajrorë në SHBA nuk iu kërkua më të hiqnin këpucët gjatë kontrolleve të sigurisë.

Ky rregull ishte vendosur në vitin 2006, disa vite pas tentativës së dështuar të vitit 2001 nga i ashtuquajturi “bombarduesi me këpucë”, Richard Reid, për të rrëzuar një fluturim nga Parisi drejt Majamit.