Parisi në alarm, policia franceze ndalon një sulm të dyshuar me bombë, arrestohet autori

Këtë të shtunë policia franceze ka ndaluar një sulm të dyshuar me bombë jashtë një banke amerikane në Paris, pasi arrestoi një burrë që ishte gati të aktivizonte një pajisje shpërthyese të improvizuar, thanë burimet e njohura me çështjen.

Ngjarja ndodhi rreth orës 03:30 sipas orës lokale përpara një ndërtese të Bank of America në zonën e rrethit të 8-të, disa rrugë larg Champs-Elysees.

Sipas raportimeve të mediave vendase, policia e kapi burrin menjëherë pasi ai vendosi një pajisje, e përbërë nga rreth pesë litra lëng që besohet të jetë karburant dhe një sistem ndezjeje.

Zyra e prokurorit kundër terrorizmit në Francë i tha AFP-së të shtunën se ka marrë në dorë hetimin. Ajo konfirmoi se i dyshuari, i kapur në flagrancë, ndodhet në paraburgim dhe se po hetohet për “tentativë dëmtimi me zjarr ose mjete të tjera të rrezikshme në lidhje me një ndërmarrje terroriste” dhe për “komplot kriminal terrorist”.

Si policia gjyqësore e Parisit, ashtu edhe shërbimi i inteligjencës së brendshme të Francës, Drejtoria e Përgjithshme për Sigurinë e Brendshme (DGSI), janë përfshirë në hetim, shtoi zyra.