Pas 15 muajsh bllokim rifillon lëvizja e trageteve Sarandë-Korfuz

Pas 15 muajsh ndërprerje, ka rifilluar lëvizja e trageteve në linjën Sarandë-Korfuz. Deri më 5 korrik, lëvizja me pasagjerë do të bëhet vetëm drejt Korfuzit, ndërkohë që në kthim drejt Sarandës, tragetet do të jenë bosh. Nga data 6 korrik do të fillojnë edhe linjat vajtje-ardhje midis dy porteve.

Në ditën e parë të rinisjes së lëvizjes së trageteve ka pasur shumë interes, pasi dhjetëra automjete dhe pasagjerë u larguan drejt Korfuzit. Trageti i parë u nis në orën 16:00.

Përfaqësuesja e Shoqërisë së Trageteve, Panorea Nikolla tha se çdo udhëtar i linjës Sarandë-Korfuz duhet të plotësojë online formularin PLF dhe të ketë me vete certifikatën e vaksinimit, ose testin negativ PCR.

Pak para nisjes së tragetit, udhëtarët u shprehen të gëzuar për rifillimin e lëvizjes së trageteve nga Saranda në Korfuz.

“Dita e parë, por edhe hera e parë për mua nga Saranda. Them se do jetë një udhëtim i këndshëm dhe është diçka shumë e bukur për faktin se kemi qenë të mbyllur për një periudhë kohe të gjatë. Kjo do të thotë se më në fund erdhi dita të lëvizim lirshëm edhe nga bregdeti”, u shpreh një qytetare.

“Është diçka shumë e mirë që do të shkojmë kaq shpejt ne Greqi me këtë anije. Në Korfuz do të shkojmë në aeroport dhe pastaj në Poloni. Jemi të lumtur që e patëm këtë mundësi”, tha një qytetar.

Deri më datë 5 korrik tragetet do të shkojnë me pasagjerë në Korfuz dhe do të kthehen bosh. Rikthimi i udhëtarëve në Sarandë mund të bëhet nga porti i Igumenicës. Kjo është marrëveshja paraprake me palën greke.

Pas datës 5 korrik do të fillojë dhe ardhja e udhëtarëve nga Korfuzi në Sarandë. Kërkesat e lëvizjes janë të njëjta si në pikat e tjera të kalimit kufitar. Plotësimi i formularit online të udhëtimit, test negativ për COVID-19 ose pasaportë vaksinimi dhe siguracion për udhëtimin.

LEXONI GJITHASHTU: 

• Gati të nisë punën linja e transportit Sarandë-Korfuz