Pas 20 vitesh në koma, ndërron jetë “Princi i Fjetur” i Arabisë Saudite

Princ Alwaleed bin Khaled bin Talal Al Saud, i njohur si “Princi i Fjetur”, ka ndërruar jetë ditën e djeshme në moshën 36-vjeçare, pas një periudhe 20 vjeçare në gjendje kome.

Ai ra në koma në vitin 2005, pas një aksidenti të rëndë me makinë në Londër, ndërsa ishte vetëm 15 vjeç dhe po studionte në kolegjin ushtarak në Mbretërinë e Bashkuar.

Si pasojë e aksidenti të rëndë, Princi pësoi dëmtime kritike në tru dhe gjakderdhje të brendshme, gjë që e çoi një gjendje kome për gati dy dekada ndërsa që nga ajo kohë, Princi u mbajt nën kujdesin e vazhdueshëm mjekësor.

Me kalimin e viteve, ai u bë simbol i qëndresës dhe shpresës për shumë njerëz në Arabinë Saudite dhe më gjerë.

Lëvizjet e herëpashershme, si ngritja e gishtërinjve, ushqyen shpresën për përmirësim.

Megjithatë, përkundër trajtimeve intensive nga mjekë të specializuar nga SHBA-ja dhe Spanja, ai nuk arriti të rifitonte vetëdijen.

I lindur në prill të vitit 1990, Princi Al Waleed ishte djali më i madh i Princit Khaled bin Talal Al Saud, një anëtar i shquar i familjes mbretërore saudite dhe nip i miliarderit Princ Al Waleed bin Talal.

“Me caktimin dhe fatin e Allahut, me trishtim dhe pikëllim të thellë, ne vajtojmë djalin tonë të dashur Princin Al-Waleed bin Khaled bin Talal bin Abdulaziz Al Saud, i cili ndërroi jetë sot në mëshirën e Allahut”, tha babai i tij, Princi Khaled bin Talal, në një deklaratë.

Gjithashtu, Këshilli Global i Imamëve shprehu ngushëllimet e tij për Familjen Mbretërore Saudite.

“Shprehim keqardhjen e thellë për ndarjen nga jeta të Princit Alwaleed bin Khaled, pas një beteje të gjatë dhe të dhimbshme që zgjati gati 20 vjet pas aksidentit tragjik.”

Lutjet e varrimit do të mbahen ditën e sotme, pas namazit të Ikindisë, në Xhaminë Imam Turki bin Abdullah në Riad.