Pas Mynihut dhe Berlinit, dronët “paralizojnë” fluturimet në aeroportin e Bremenit

Shfaqja e një droni pranë aeroportit të Bremenit, Gjermani, shkaktoi ndërprerje të fluturimeve për rreth një orë të dielën në mbrëmje.

Trafiku ajror në aeroportin gjerman u ndërpre nga ora 20:30 deri në 21:22, sipas orës lokale, teksa një dron u pa duke fluturuar në një zonë ngjitur me aeroportin.

Kontrolli i trafikut ajror pezulloi menjëherë të gjitha ngritjet dhe uljet, duke rezultuar në vonesën e të paktën një fluturimi dhe devijimin e një tjetri, i cili përfundimisht u ul në aeroportin e Hamburgut.

Ndërkohë, disa ditë më parë, të gjitha fluturimet në Aeroportin e Berlinit u pezulluan për dy orë për shkak të identifikimit të një droni në zonë.

Muajin e kaluar, dy incidente të ngjashme u regjistruan në Mynih, të cilat shkaktuan kaos për orë të tëra në aeroportin e dytë më të madh të Gjermanisë.

Sipas autoriteteve, incidentet me zbulimin e dronëve pranë aeroporteve gjermane janë bërë të shpeshta kohët e fundit, dhe se qeveria gjermane njoftoi krijimin e një qendre të posaçme koordinimi për t’u marrë me to, ndërsa  autorizoi policinë t’i rrëzojë ato nëse është e nevojshme.

LEXONI GJITHASHTU:

• Dron në hapsirën ajrore, aeroporti i Berlinit pezullon përkohësisht fluturimet
• “Mur dronësh”, arma e Evropës kundër agjentëve rusë