​Pas rrëzimit nga qeveria, Albin Kurti njofton tubim popullor dhe kërkon zgjedhje të parakohshme

Lëvizja Vetëvendosje do të mbajë një tubim të premten më 12 qershor në sheshin “Skënderbeu” në Prishtinë. Lajmi është bërë i ditur nga kreu i kësaj partie, Albin Kurti, i cili ka thënë se ky vendim është marrë në mbledhjen me qendrat e Lëvizjes Vetëvendosje.

Ish-kryeministri i Kosovës, Albin Kurti, thekson se ky tubim do të mbahet në kuadër të 21-vjetorit të çlirimit të Kosovës si dhe për 15-vjetorin e themelimit të Vetëvendosjes.

Pavarësisht zhvillimeve të fundit politike në vend, Lëvizja Vetëvendosje duket se do ta vazhdojë kauzën kryesore të saj, e cila është mbajtja e zgjedhjeve në të gjithë Kosovën.

“Tubim në Sheshin “Skënderbeu”, të premten me 12 qershor. Në mbledhjen e sotme me Qendrat e Lëvizjes VETËVENDOSJE! Diskutuam për shumë çështje politike dhe organizative. Nga data 10 qershor 2020 e deri më 17 qershor 2020 mbahet “Java e Lëvizjes”, organizim yni ky tradicional i përvitshëm me aktivitete të shumta. Në veçanti Qendrat tona shprehën gatishmërinë dhe interesimin që 21 vjetori i çlirimit të Kosovës dhe 15 vjetori i VETËVENDOSJE!-s, të premten e ardhshme të 12 qershorit 2020, të shënohet me një tubim publik, duke e mbajtur distancën, në Sheshin ‘Skënderbeu’ në Prishtinë. Ndërkohë vazhdon mbledhja e nënshkrimeve të peticionit “Duam Zgjedhje!” anembanë Kosovës.”, shkruan Kurti.

Pak ditë para se të lironte karrigen e kryeministrit, Albin Kurti, mori një sërë vendimesh të rëndësishme, mes tyre vendosjen e masës së reciprocitetit kundrejt Serbisë.  

Ky vendim i tij nuk zgjati shumë pasi u shfuqizua menjëherë nga kryeministri i qeverisë së re, Avdullah Hoti. Ky i fundit tha se ky vendim do t’i japë impulse të reja vazhdimit të dialogut mes Kosovës dhe Serbisë.