Pas SHBA, edhe Mbretëria e Bashkuar kritikon mungesën e konsensusit për Kodin Zgjedhor

Votimi në Kuvend i Kodit Zgjedhor ka vënë në lëvizje edhe faktorin ndërkombëtar. Pas SHBA, ishte ambasada e Mbretërisë së Bashkuar në Tiranë, e cila reagoi rreth zhvillimeve të sotme në Shqipëri, ku mazhoranca socialiste në bashkëpunim me një pjesë të deputetëve të opozitës parlamentare  kaluan ndryshimet në Kodin Zgjedhor me 97 vota pro.

Përmes një deklarate të shkurtër të shpërndarë në faqen zyrtare në “Facebook”, ambasada e Mbretërisë së Bashkuar shpreh keqardhje  që ndryshimet e sotme u bënë pa konsensus të gjerë.

“Marrëveshja e 5 qershorit ishte një hap i rëndësishëm përpara, i arritur përmes dialogut dhe negociatave. Shprehim keqardhje që ndryshimet e sotme janë bërë pa dakordësinë e Këshillit Politik dhe pa shteruar përpjekjet për të gjetur konsensus”, thuhet në reagimin e ambasadës së Mbretërisë së Bashkuar në Tiranë.

Veprimet e njëanshme nga mazhoranca qeverisëse nuk u pritën mirë as nga ana e opozitës jashtëparlamentare. Kryetari i PD-së Lulzim Basha dhe liderja e LSI-së, Monika Kryemadhi u shprehën se veprimi i sotëm në Parlament e kthen pas Shqipërinë dhe krijon pengesa të reja për integrimin e saj në Bashkimin Europian.

Lexoni gjithashtu: 

Parlamenti miraton KQZ-në e re, Ilirjan Celibashi zgjidhet kryetar

Pas debatesh të ashpra, miratohet në parlament Kodi i ri Zgjedhor

Ndryshimet e Kodit Zgjedhor, Rama: Koalicionet s’mund të jenë kope, sot ne do t’i qytetërojmë

Rudina Hajdari bllokon foltoren e Kuvendit: Ndërpriteni këtë seancë të turpshme, po mashtroni shqiptarët siç bëtë 30 vjet

Ndryshimet në kodin zgjedhor, Gjiknuri: Modeli ynë korrigjon çdo anomali, asnjë parti s’meriton fonde publike nëse nuk merr 1 % të votave