Pasaportat për vaksinat, mjeku Taned Demaj: Vështirë të aplikohen

Mjeku shqiptar në Itali, Taned Demaj, komentoi për Euronews Albania diskutimet në vende të ndryshme rreth aplikimit të një pasaporte për vaksinim nga COVID-19.

Demaj tha se për momentin duket e vështirë për t’u aplikuar, pasi numri i të vaksinuarve mbetet i vogël dhe kjo do të kufizonte lëvizjet e njerëzve.

I pyetur rreth faktit nëse do të miratohet një pasaportë, a do të lejohen të lëvizin edhe qytetarë, si për shembull qytetarët shqiptarë, të cilët po vaksinohen me vaksina që nuk janë miratuar ende nga autoritetet evropiane, mjeku Demaj tha se aktualisht po diskutohet edhe për këtë çështje.

“Është problem sepse BE pranon vetëm katër vaksinat Pfizer, AstraZeneca, Johnson&Johnson dhe Moderna, por besoj se është ende në diskutim dhe tani për tani kërkohet tampon molekular ndaj qytetarëve që kthehen apo udhëtojnë prej këtyre vendeve,” – u shpreh Demaj.

Mjeku shqiptar tha se “nuk ka pasaportë” por “certifikatë, apo fletë vaksinimi” me të cilat “mund të udhëtohet”.

“Vërtetë pasaportat japin të drejtën për të lëvizur duke qenë se është ideja se nuk infektohesh, por sot e kësaj dite nuk ka një certifikim që të thotë se personat e vaksinuar nuk infektojnë të tjerët,” – u shpreh mjeku shqiptar.