Pasuria e ish-kryeprokurorit Llalla, GJKKO: Shpallëm moskompetencën sipas parashikimeve ligjore

Në fillim të dhjetorit Gjykata e Posaçme do të vendoste nën sekuestro një apartament dhe katër sipërfaqe toke në pronësi të Adriatik Llallës, pas hetimit pasuror që SPAK kishte kryer në bazë të ligjit antimafia për ish-kryeprokurorin.

 Ndërkohë në nëntor gjyqtarja Irena Gjoka pranoi kërkesën e SPAK për gjykimin e Llallës për fshehje të pasurisë, por liroi nga sekuestroja të njëjtat prona të sekuestruara në fillim të hetimit nga ish-Krimet e Rënda.

Por, tashmë për gjykimin e sekuestros gjyqtarja Ilirjana Olldashi ka shpallur moskompetencën duke ia përcjellë dosjen Gjykatës së Tiranës.

Për këtë Euronews Albania u interesua pranë Gjykatës së Posaçme të Shkallës së Parë , sipas të cilës vendimi është marrë konform parashikimeve ligjore të ligjit antimafia, për sa kohë ndaj ish-kryeprokurorit nuk ka akuzë për korrupsion.

Adriatik Llalla është marrë I pandehur për mosdeklarim dhe fshehje pasurie, vepër e cila, dënohet me gjobë ose me burgim deri në tre vjet.

 Ai u zgjodh Prokuror i Përgjithshëm në vitin 2012 dhe e mbajti këtë post deri në nëntor 2017, kur i mbaroi mandati 5-vjeçar. Hetimi ndaj Llallës u regjistrua fillimisht nga Prokuroria e Durrësit më 15 mars 2018 nën akuzat e fshehjes së pasurisë, shpërdorimit të detyrës dhe pastrimit të parave, vepra të cilat ranë.