Pekini paralajmëron Trumpin pas kërcënimit për tarifa: Kina do t’i mbrojë me vendosmëri interesat e saj

Kina njoftoi se do të mbrojë “me vendosmëri” interesat e saj, pas deklaratës së Presidentit të SHBA-së Donald Trump se Shtetet e Bashkuara do të vendosin tarifa doganore prej 25% për çdo vend që tregton me Iranin.

“Ne gjithmonë kemi besuar se nuk ka fitues në një luftë tregtare dhe Kina do të mbrojë me vendosmëri të drejtat dhe interesat e saj legjitime”, tha zëdhënësja e Ministrisë së Jashtme Mao Ning.

Duke vazhduar, Mao Ning përsëriti se Kina është kundër operacioneve të mundshme ushtarake amerikane në Iran, i cili po tronditet nga protestat antiqeveritare, ndërsa Trump kërcënon të ndërhyjë… në favor të iranianëve që kanë dalë në rrugë kundër regjimit të mullahëve dhe Trupave të Gardës Revolucionare Islamike.

E pyetur për sigurinë e shtetasve kinezë në Iran dhe të turistëve kinezë që vizitojnë vendin, Mao tha se Pekini po “monitoron nga afër zhvillimin e situatës”. “Ne do të marrim të gjitha masat e nevojshme për të mbrojtur sigurinë e shtetasve kinezë”, tha ajo.