Pekini prezanton aeroplanmbajtësen e re, sfidon Amerikën për dominimin detar

Kina prezantoi aeroplanmbajtësen e parë të saj të ndërtuar nga inxhinierë vendas, të quajtur “Fujian”, në një ceremoni të ndjekur nga vetë presidenti Xi Jinping në ishullin Hainan.

Anija luftarake përbën një hap tjetër përpara sa i takon ambicieve të Pekinit për të ndërtuar një ushtri të klasit botëror, në gjendje të sfidojë dominimin detar amerikan brenda mesit të shekullit.

Anija, e treta që zotëron Kina por e para e ndërtuar me teknologji vendase, është një nga shembujt më të dukshëm të fushatës së Xi për të modernizuar forcat e armatosura brenda vitit 2035.

Raporti i fundit i Pentagonit për Kongresin amerikan e konsideron Kinën një ushtri tërësisht të aftë për të ushtruar ndikim globalisht dhe për këtë arsye mbetet konkurrentja kryesore e Shteteve të Bashkuara, me qëllimin përfundimtar për të ndryshuar rendin botëror.

Sipas ekspertëve, Pekini synon të dominojë ujërat detare, përfshirë detin e Kinës së Jugut, atë të Kinës Lindore dhe detin e Verdhë përreth Zinxhirit të Parë të Ishujve që kalojnë në jug përmes Japonisë, Tajvanit dhe Filipineve.

Ndërsa në thellësi të Paqësorit, Kina synon të kontestojë dominimin e Zinxhirit të Dytë të Ishujve, ku Shtetet e Bashkuara ka ende një prani të theksuar ushtarake në ishullin e Guamit dhe në zona të tjerea.

Anija “Fujian” anashkalon teknologjinë e katapultës me avull që mbajnë shumica e aeroplanmbajtëseve amerikane, duke përdorur në vend të saj një sistem lëshimi elektromagnetik, i pranishëm vetëm në modelet e fundit amerikane të klasit “US Navy Ford”.

Sistemi në fjalë mundëson një presion më të lehtë ndaj anijes, i mundëson asaj të jetë më precize dhe e shpejtë dhe mund të lëshojë një gamë më të gjerë avionësh sesa sistemet me avull.