Për 6 muaj pritet zgjidhje për targat Kosovë-Serbi

Sot në Bruksel është mbajtur takimi i parë i grupit punues për targa ndërmjet Kosovës dhe Serbisë.

I dërguari i Posaçëm i Bashkimit Evropian për dialog, Miroslav Lajçak ka thënë se pret që në një periudhë prej gjashtë muajsh të ketë një zgjidhje konkrete për çështjen e targave për automjetet e Kosovës dhe Serbisë.

“Sot në mëngjes në Bruksel mirëprita delegacionet e ekspertëve për takimin e parë të grupeve punuese për targat, siç ishim pajtuar më 30 shtator. Grupi i kryesuar nga këshilltarët e mi do të takohet rregullisht. Besoj se ata do të prezantojnë gjetjet konkrete brenda gjashtë muajsh”, shkruan Lajçak në Twitter.

This morning in Brussels, I welcomed the expert delegations for the first meeting of the Working Group on license plates, as agreed on 30 September. The Group chaired by my advisers will be meeting on a regular basis. I trust they will present concrete findings in 6 months. pic.twitter.com/dwxZGV1PAM

— Miroslav Lajčák (@MiroslavLajcak) October 21, 2021

Vendimi për të formuar grupin punues për targat ishte rezultat i takimeve së fundi që ekipet negociuese patën në Bruksel me të dërguarin e Posaçëm për dialog, Lajçak, në kohën kur kishin shpërthyer tensionet për shkak të vendosjes së masave të reciprocitetit.

Kosova dhe Serbia ranë dakord në Bruksel më 30 shtator për një zgjidhje të përkohshme që përmes letrave ngjitëse të qarkullojnë veturat e njëra tjetrës në të dyja vendet.

Veriu i Kosovës u tensionua pas 20 shtatorit kur qeveria vendosi reciprocitet në targa të veturave të Serbisë, pasi një gjë të ngjashme Serbia e ka aplikuar për veturat nga Kosova për më shumë se dhjetë vjet.

LEXONI GJITHASHTU:

• Serbët sulm me granata në veri të Kosovës, shkak reciprociteti për targat
• Hyn në fuqi zbatimi i marrëveshjes për targat mes Kosovës dhe Serbisë