Përçahet opozita parlamentare, bie numri për ndryshimin e Kushtetutës

As 48 orë nuk zgjati konsensusi i opozitës parlamentare për të iniciuar ndryshimin e kushtetutës me qëllim hapjen e listave.

Dy deputetët e Ballit Kombëtar Demokrat, Artur Roshi dhe Besnik Troplini kanë tërhequr firmën e tyre nga lista me 29 deputetë.

Nëpërmjet një postimi në rrjetet sociale, deputeti Artur Roshi theksoi se kishte hedhur firmën në një marrëveshje “xhentëlmenësh” ku kërkonte vetëm hapjen e firmave dhe jo futjen e elementëve të tjerë të propozuar nga opozita parlamentare, si heqja e koalicioneve apo rritje e pragut për të fituar mandatin e deputetëve në 5%.

“Firmosa në një marrëveshje xhentëlmenësh se do të qëndrohej në hapjen e listave. Anonçimi në media se do ndërhyhet në Kushtetutë për të ndaluar koalicionet parazgjedhore dhe vendosja e pragut 5% është shqetësuese sepse tregon se dikush është i interesuar”, tha ai.

Kësisoj, largimi i dy deputetëve të Ballit bën nul të gjithë nismën e opozitës parlamentare pasi në rregulloren e Kuvendit sanksionohet minimumi i formave që duhet për të ndryshuar Kushtetutës është 1/5 e të gjithë anëtarëve të parlamentit, pra jo më pak se 28 deputetë dhe në nismën e opozitës kanë mbetur vetëm 27 firma.

Por, kur nga njëra anë opozita po përçahet, nga vetë maxhoranca po vijnë sinjale që janë pro hapjes së listave së bashku me propozimet e tjera për heqjen e koalicioneve apo rritjen e pragut.

Deputeti Adnor Shameti po në një postim në rrjete sociale u shpreh pro duke nënvizuar se “është shumë e shëndetshme të ketë hapje listash dhe natyrisht si rrjedhojë të mos ketë më koalicione parazgjedhore”.