Përfundon takimi në Bruksel, Vuçiç polemika me Kurtin për njohjen e Kosovës

Përfundon në Bruksel takimi mes kryeministrit të Kosovës, Albin Kurti dhe presidentit të Serbisë, Aleksandër Vuçiç.

Pas takimit, presidenti i Serbisë ka deklaruar për mediat se është rënë dakord për të vazhduar dialogun deri në fund të muajit korrik.

“Unë nuk di çfarë t’ju them, të jem i sinqertë mendoj se  zgjatja e bisedimeve flet edhe për rezultatet, u ra dakord për të vazhduar dialogun deri në fund të korrikut, shpresoj se kjo është një gjë e rëndësishme që mund të garantojnë paqen dhe stabilitetin. Çdo gjë tjetër do të ishte e panevojshme për t’u komentuar”, u shpreh presidenti serb para mediave.

Ai shtoi se delegacioni i Kosovës nuk dëshiron të përmbushë marrëveshjet e nënshkruara dhe nuk do të diskutojë mbi bashkimin e komunave serbe.

Vuçiç tregoi se në këtë takim nuk kanë munguar edhe përplasjet me kryeministrin Kurti, ku i ka theksuar se nuk do ta njohë asnjëherë Kosovën si shtet.

“Ai më pyeti kur do ta njohësh Kosovën dhe unë ju përgjigja ‘asnjëherë’. Erdhi në Bruksel për të mos rënë dakord për asgjë”, ka deklaruar Vuçiç.

Në këtë takim ishin të pranishëm edhe kreu i diplomacisë së BE-së, Josep Borrell si dhe ngarkuari i Bashkimit Evropian për dialogun Kosovë-Serbi, Miroslav Lajçak.

LEXONI GJITHASHTU:

Rinisja e dialogut Kosovë-Serbi, analisti Maliqi: S’pres ndonjë zhvillim me rëndësi nga Brukseli

Nis në Bruksel takimi Kurti-Vuçiç, të pranishëm në tryezën e bisedimeve Borrell dhe Lajçak

Kurti përballë Vuçiç, analisti Hajrullahu: Kryeministri i Kosovës nuk shkon për të vijuar dialogun