Përgjysmimi i dënimit të Darko Tasiç, banori i Krushës së Madhe: Ndihemi keq, drejtësia ka probleme

Banori i Krushës së Madhe, Selami Hoti komentoi në Euronews Albania vendimin e Gjykatës së Apelit për përgjysmimin e dënimit të shtetasit serb, Darko Tasiç. Hoti u shpreh se ky vendim tregon se drejtësia në Kosovë ka probleme. 

“I njëjtë sikur edhe ai parapraku para 6 muajsh, kur nuk mori dënimin e merituar dhe na doli se nuk kanë qenë prova të mjaftueshme dhe nuk i është ngritur akuza për krime, por vetëm për keqpërdorim të mjeteve të përdorura, plaçkitje apo abuzim me kufoma.

Bazuar në dëshmitarë të cilët kanë dhënë dëshminë e tyre, mbase edhe vetë ata kanë konsideruar që janë dëshmi të mjaftueshme. Tani dalin që ato dëshmi nuk kanë qenë aq të forta saqë ai të jetë vetë krimineli. Për ne si familjarë drejtësia duket që ka probleme”, u shpreh ai.

“Vendimi gjykatës ne si familjarë na bën të ndihemi shumë keq”, shtoi Hoti më tej.

Banori i Krushës së Madhe tregoi masakrat që kanë ndodhur në fshatrat Krushë e Madhe dhe Krushë e Vogël, që sipas tij kanë qenë aksione të organizuara nga ushtria serbe. 

“Flitet për masakrën që ka ndodhur gjatë datës 25, 26, 27 mars deri në përfundim të luftës, ku forcat serbe në mënyrë të organizuar përgjatë rrugës nacionale Gjakovë-Prizren kishin rrethuar fshatrat dhe kishin vënë komandën e tyre në fshatin Hoç e Madhe, fshat që tani fatkeqësisht është me serbë, por më parë ka pasur shqiptarë.

Nga aty posta e komandës ka organizuar operacionin për të shkuar tutje, për të shkatërruar shtabet e UÇK-së në ato vende. Këta kanë bërë pastrimin e terrenin, krehjen e fshatrave duke i vrarë të gjithë në fshatin Krushë e Vogël, Krushë e Madhe, në të gjithë luginën nga Rahoveci deri në Landovicë, që sipas BBC-së atëherë u quajt luginë e vdekjes.

Në fshatin Krushë e Madhe, nga 241 banorë kanë ngelur të pagjetur 64″, tregoi ai. 

Lexoni gjithashtu:

 Përgjysmimi i dënimit të serbit Darko Tasiç, Gjykata e Apelit: U dënua më shumë sesa parashikonte ligji