Përleshjet e dhunshme në Siri, vriten më shumë se 70 persona

Luftimet më të ashpra që nga rrëzimi i Bashar al-Assadit kanë shpërthyer në rajonin bregdetar të Sirisë, ku forcat e lidhura me qeverinë e re islamike po përballen me luftëtarët besnikë të ish-presidentit.

Sipas Observatorit Sirian për të Drejtat e Njeriut, me bazë në Britani, më shumë se 70 persona janë vrarë në përleshjet e dhunshme. Luftimet kanë përfshirë qytetet portuale Latakia dhe Tartous, ku autoritetet kanë shpallur shtetrrethim.

Përleshjet nisën kur forcat qeveritare ranë në një pritë gjatë një operacioni sigurie në Latakia. Përforcime të shumta janë dërguar në zonë, ndërsa video të publikuara në internet tregojnë për të shtëna të fuqishme në disa lagje.

Rajoni bregdetar, i njohur si bastion i familjes Assad dhe zemra e pakicës alavite, është kthyer në epiqendrën e përleshjeve të fundit. Sipas raportimeve të mediave vendase, forcat e lidhura me qeverinë e re siriane kanë vrarë rreth 70 ish-luftëtarë të regjimit, ndërsa më shumë se 25 të tjerë janë kapur në Jableh dhe zonat përreth.

Përleshje janë raportuar edhe në qytetet Homs dhe Aleppo, ku në mediat sociale kanë qarkulluar pamje të paverifikuara që tregojnë kërcitjen e armëve në zonat e banuara të Homsit.

Një zëdhënës i Ministrisë së Mbrojtjes të Sirisë, koloneli Hassan Abdul Ghani, paralajmëroi besnikët e Assadit që luftojnë në Latakia përmes mediave shtetërore:

“Mijëra kanë zgjedhur të dorëzojnë armët dhe të kthehen te familjet e tyre, ndërsa disa këmbëngulin të ikin dhe të vdesin në mbrojtje të vrasësve dhe kriminelëve. Zgjedhja është e qartë: lini armët ose përballuni me fatin tuaj të pashmangshëm.”

Rajoni bregdetar është bërë një sfidë madhore sigurie për presidentin e përkohshëm, Ahmed al-Sharaa. Aktivistët alavitë raportojnë se komuniteti i tyre po përballet me dhunë dhe sulme të vazhdueshme që nga rrëzimi i Assadit, veçanërisht në Homs dhe Latakinë rurale.

LEXONI GJITHASHTU:

• Zelensky njofton vizitën në Arabinë Saudite, pjesë e takimit edhe SHBA-ja
• Trump nënshkruan dekretin për krijimin e Rezervës Strategjike të Bitcoin