Përmbytje në Brazil, shembet diga e rritet numri i të vdekurve në Rio Grande do Sul

Një digë hidroelektrike është shembur në Brazilin jugor pas ditëve të shiut të dendur që shkaktuan përmbytje masive, duke vrarë më shumë se 30 njerëz.

Sipas mediave të huaja, zyrtarët thonë se 60 persona të tjerë janë të zhdukur në shtetin Rio Grande do Sul.

Rreth 15,000 banorë janë larguar nga shtëpitë e tyre që nga e shtuna. Të paktën 500,000 njerëz janë pa energji dhe ujë të pastër në të gjithë vendin.

Diga e shpërthyer shkaktoi një valë dy metra, duke shkaktuar panik dhe dëme të mëtejshme në zonat tashmë të përmbytura.

Diga ndodhet midis komunës së Cotiporã dhe qytetit të Bento Gonçalves.

Moti ekstrem është shkaktuar nga një kombinim i rrallë i temperaturave më të nxehta se mesatarja, lagështia e lartë dhe erërat e forta.

Presidenti brazilian, Luiz Inácio Lula da Silva, ka vizituar rajonin, duke premtuar ndihmë nga qeveria qendrore.

Më herët, guvernatori i shtetit, Eduardo Leite, u lut për ndihmë urgjente, duke thënë se “ne duhet të shpëtojmë qindra njerëz në dhjetëra komuna”.

Helikopterët janë vendosur për të kërkuar personat e bllokuar.

Në disa zona, përmbytjet janë aq të rënda sa helikopterët nuk kanë mundur të zbarkojnë dhe u është dashur t’i çojnë banorët në zona të sigurta.

Në komunën Candelária, banorët u ngjitën në çatitë e shtëpive të tyre ndërsa shtëpitë e tyre u mbushën me ujë.

Meteorologët kanë parashikuar shira të mëtejshëm që do të bien në rajon ndërsa një front i ftohtë lëviz nëpër të.

Vitin e kaluar, më shumë se 30 njerëz u vranë në një ciklon në Rio Grande do Sul.

Instituti Kombëtar i Meteorologjisë i Brazilit ia atribuoi intensitetin dhe frekuencën e shtuar të reshjeve fenomenit klimatik El Niño.

LEXONI GJITHASHTU:

• Të paktën 118 të burgosur u arratisën në Nigeri pas përmbytjet dëmtuan burgun
• Përmbytjet masive në Kinë, evakuohen 60 mijë njerëz