Përplasje fizike mes anëtarëve të LSI-së dhe policisë Bashkiake në Fier

Dy kandidatë për deputetë dhe mbështetës të Lëvizjes Socialiste për Integrim u përplasën fizikisht ditën e sotme me punonjësit e policisë bashkiake të Fierit.

Shkak për konfliktin është bërë heqja e një banderole të LSI-së në bulevardin kryesor të qytetit gjatë përgatitjeve për mbylljen e fushatës elektorale të Partisë Socialiste.

Kejdi Mehmetaj dhe Arben Çuko, të cilët janë kandidatë për deputetë të LSI-së në qarkun Fier kërkuan të kontaktojnë me përfaqësues të Bashkisë Fier, mirëpo nuk janë lejuar nga punonjësit e policisë bashkiake që të hyjnë në mjediset e Bashkisë. Kjo shkaktoi përshkallëzimin e situatës deri në përplasje fizike.

Pamjet e siguruara nga Euronews Albania tregojnë momentet e tensionit, ku përveç fjalëve të shkëmbyera mes palëve ka pasur edhe shtyrje dhe përplasje fizike.

Ngjarja në fjalë nxiti reagimin e Presidentit Ilir Meta i cili përmes një postimi në Facebook u kërkoi kandidatëve të LSI-së në Fier “të mos bien pre e provokimeve” dhe “ta tejkalojnë me urtësi këtë moment”.

Bashkia Fier dhe LSI kanë marrëveshje për vendosjen e banerave dhe materialeve informuese rreth fushatës së tyre zgjedhore.

LEXONI GJITHASHTU: 

• Tensione në Berat, fugoni me ushqime nga Rezervat e Shtetit bllokohet nga PD