Peshëngritësja shqiptare Evangjeli Veli: Synoj medalje dhe në botëror

Pak ditë pasi mori medalje të bronztë në Evropianin e peshëngritjes, Evangjeli Veli tregoi për Euronews Albania se e priste një medalje dhe se tashmë po punon që të vijojë me të njëjtën formë edhe në botëror.

Në intervistë me gazetaren Esmeralda Mulaj, Veli, e cila jeton dhe studion në Greqi, tha se e kishte pasur të vështirë të vijonte stërvitjet për shkak të masave kufizuese në vendin fqinj.

“Babai im ndërtoi palestër brenda në shtëpi që unë të stërvitesha sërish, pasi prej shtetrrethimit tre muaj mbeta prapa me stërvitjen,” – tha Veli.

Në tetor pritet që të zhvillohet kampionati botëror në Gjeorgji dhe peshëngritësja shqiptare tha se po stërvitet që të marrë rezultat pozitiv edhe atje.

Të dielën Veli arriti të sigurojë medalje bronzi në stilin e shkëputjes në kampionatin Evropian në Rusi.

Sportistja kuqezi garoi në peshën 55 kilogram dhe arriti që të ngrinte në shkëputje 89 kg. Në stilin e shtytjes Veli ngriti 105 kg, duke u pozicionuar po në vendin e tete, ndërsa në dy garësh u rendit e pesta.

Me rezultatet e arritura Veli shënoi dhe tre rekorde kombëtare, ndërsa u be sportistja e parë në këtë kampionat Evropian që i sjell medalje Shqipërisë.