Petro Koçi sqaron në SPAK denoncimin se krimi ka vënë dorë në tenderët publikë

Deputeti i zgjedhur i PS, Petro Koçi dëshmoi sot në Strukturën e Posaçme Anti-Korrupsion (SPAK) rreth deklaratave të tij për kapjen e tenderëve nga krimi i organizuar në Fier.

Koçi tha pas dëshmisë se denoncimet e tij i ka bazuar në kontaktet me elektoratin dhe se duke mos pasur dokumente apo fakte konkrete nuk mund të përmendte emra zyrtarësh, politikanësh, subjektesh apo individësh të përfshirë me krimin.

“Qëndrimet e mia nuk janë për të larë hesapet me asnjë politikan, por me krimin […] Shumica e zyrtarëve në Fier nuk e kanë mirëpritur deklaratën time dhe kjo do të thotë se është e vërtetë dhe dhemb për ta,” – tha Koçi.

Ai u shpreh se zyrtarët duhen përkrahur që të mos nënshtrohen përballë kërcënimeve nga krimi.

Gazetari i Euronews Albania, Eni Ferhati, tha se për denoncimin dhe dëshminë e Koçit nuk ka ende një hetim të hapur nga SPAK.

Javën e shkuar ish-zv. ministri i Mbrojtjes u shpreh në rrjetet sociale se persona me të shkuar kriminale kanë pastruar para përmes biznesit të ndërtimit dhe tashmë janë përfshirë në tenderët publikë në Fier, të cilat, sipas tij, i përfitojnë përmes njohjeve apo duke kërcënuar nëpunës dhe subjektet konkurrente.

Ai e shpjegoi denoncimin e tij në një intervistë për Euronews Albania ku tha se në Fier krimi i organizuar është konsoliduar ndër vite duke legalizuar biznese të ndryshme.

Denoncimi publik i Koçit u bë më 16 korrik, 10 ditë pasi SPAK arrestoi kreun e Bashkisë Lushnje, Fatos Tushe bashkë me disa zyrtarë të tjerë për abuzime me tenderët.

LEXONI GJITHASHTU:

• Petro Koçi: Krimi po përdor këto tre mënyra për të përfituar nga tenderat publikë
• Arrestohet kryetari i Bashkisë së Lushnjës, Fatos Tushe