Pika doganore e Kapshticës dhe ajo e Qafë-Botës vijojnë të jenë të mbyllura

Megjithëse ministria e Jashtme shqiptare njoftoi se që nga dita e sotme shtetasit shqiptarë mund të udhëtonin drejt Greqisë për arsye familjare dhe turistike, situata që paraqitet në dy pikat doganore, Kapshticë dhe Qafë-Botë është krejt tjetër.

Gazetari i Euronews Albania, Xhensil Shkëmbi raportoi nga pika doganore e Kapshticës se autoritetet greke kanë njoftuar zyrtarët e kësaj pike kufitare se do të shtyjnë hapjen e saj të paktën deri në datën 28 qershor.

Aktualisht në këtë pikë kufitare mund të kalojnë drejt shtetit grek vetëm punonjësit sezonalë dhe ata persona që disponojnë një pasaportë greke, ku kapaciteti është prej 400 personash në ditë.

Një situatë e ngjashme është edhe në pikën doganore të Qafë-Botës.

Gazetari Viktor Avdiaj raportoi se asnjë turist nuk mund të kalojë drejt Greqisë nga kjo pikë kufitare, të paktën për sot.

Ndërkohë, nga pika kufitare e Kakavijës lejohen të kalojnë kufirin të gjitha kategoritë e udhëtarëve për qëllime familjare dhe turistike, por sipas rregullave të publikuara një ditë më parë nga ministria e Jashtme shqiptare.

LEXONI GJITHASHTU:

Sot Greqia hap kufijtë me Shqipërinë, njofton ministria e Jashtme shqiptare

Hoqi kufizimet për udhëtimet, ambasada gjermane publikon udhëzimet

Udhëtimet drejt BE-së, Tomini: Qytetarët duhet të marrin informacion nga shteti ku duan të shkojnë