Pikat e karburanteve fituan 3500 €, disa mbajtën çmim më të ulët se bordi

Pikat e karburantit me pakicë kanë fituar mesatarisht për të gjithë muajin maj 3500 euro.

Sipas të dhënave zyrtare të Ministrisë së Financave, sasia e karburantit të zhdoganuar muajin e shkuar është afro 53 milionë litra, duke i lejuar pikave një fitim maksimal prej 0.1 euro për litër, fitimi nuk do të kalonte 3500 euro për 1500 pika që ka gjithë vendi.

Me këto të ardhura shumica e pikave do të ishin mbyllur, pasi nuk do të arrinin të mbulonin shpenzimet për paga, qiranë e benzinatës dhe kosto të tjera operative që përfshijnë energjinë elektrike, ujin dhe mirëmbajtjen e pajisjeve.

Vendimet e Bordit të Transparencës i cili ndryshon njëherë në javë çmimin e naftës, pa llogaritur sasinë që duhet për rezervë sigurie për të paktën 3 muaj, kanë ngritur dyshime për manipulime me çmimet edhe nga vetë shoqatat e bizneseve.

Konfindustria kërkon që të përjashtohen nga kjo vendimmarrje tregtarët e karburantit pasi ndodhen në konflikt të hapur interesi dhe hedh dyshime për rritje të fitimeve të tyre përmes kontrabandës.

“Konfindustria vlerëson se përfituesit e vetëm të mënyrës së deritashme të punës së Bordit të Transparencës janë buxheti i shtetit dhe kompanitë e karburanteve”.

Çmimi i fundit i vendosur nga Bordi i Transparencës është 261 lekë për litër për naftën, por pika të veçanta karburanti e mbajnë edhe më të ulët se kaq, çka tregon se arrijnë të mbulojnë kostot dhe një fitim normal edhe me çmim më të ulët se ai i bordit.

Çmimet e larta të naftës ulën me 20% konsumin në muajin maj, ndërsa një pjesë e qytetarëve drejtohen në shtetet kufitare me Shqipërinë për të furnizuar automjetin.

LEXONI GJITHASHTU:

• Bordi i Transparencës përcakton çmimin e ri për karburantet
• Bie çmimi i naftës në bursë më 3%, reflektohet në karburantet Shqiptare