Pista e cirkuitit saudit të ”Jeddah” më e shpejta në Formulën 1

Cirkuiti i Jeddah-s në Arabinë Saudite, i cili pritet të përurohet këtë sezon në Formulën 1, pritet të jetë më i shpejti i garave me njëvendëshet sportive.

Pista, e cila do të jetë në bregun perëndimor të “Detit të Kuq”, është rreth 6.2 kilometra e gjatë dhe me simulimet e bëra deri më tani ka një mesatare të shpejtësisë prej 250 kilometrash në orë.

Drejtori i përgjithshëm i Formulës 1, Ross Brawn tha se kjo e dhënë ka nxitur entuziazmin e tifozëve të cilët do të kenë shumë pritshmëri nga kjo garë.

“Dizajni sjell më të mirën e rrugës moderne të një cirkuiti dhe ia bashkangjit atë trajektoreve të shpejta për të krijuar një pistë ku do të ketë shpejtësi dhe shumë mundësi për parakalime,” – tha Brawn.

Gara e Jeddah-s është parashikuar të mbahet më 3 dhe 5 dhjetor. Cirkuiti ka 27 kthesa të kombinuara dhe një kthesë “S”. Kjo pistë është konsideruar të jetë e përkohshme deri sa në kryeqytetin saudit të Rijadhit të ndërtohet cirkuiti i Qiddiyah-ut.