“Piu kokainë në sy të fëmijëve dhe mori peng fëmijët”, detaje nga ngjarja në Durrës

Një 40-vjeçar ka mbajtur për disa orë peng në banesë dy fëmijët e tij të mitur dhe i ka terrorizuar duke qëlluar në ajër me armë zjarri.

Ngjarja e rëndë është regjistruar tek Shkëmbi i Kavajës, në një apartament që 40-vjeçari Aleks Marku kishte marrë me qira ditore.

Menjëherë pasi mbërritën në vendngjarje forcat e policisë i kanë bërë thirrje të dorëzohet, por 40-vjeçari i është përgjigjur sërish me të shtëna me armë.

Në këto kushte, për të mos rrezikuar jetën e efektivëve të Durrësit dhe të fëmijëve që ai mbante peng, është kërkuar ndihma e forcave RENEA, të cilat pas disa orësh negociata kanë arritur që ta bindin 40-vjeçarin që të dorëzohet.

Gazetari Igli Çelmeta tha në emisionin Now në Euronews Albania se RENEA-s i është dashur të negociojë mbi 5 orë me 40-vjeçarin para se të dorëzonte armën.

Ai tregoi se forcat RENEA kanë mundur të bindin Markun të dorëzohet vetëm rreth orës 7.20 të mëngjesit dhe kur kanë hyrë në banesën ku mbante peng dy fëmijët e tij të mitur kanë gjetur lëndë narkotike të cilën dyshohet se e ka konsumuar në sy të fëmijëve.

“Pasi janë futur në banesë kanë konstatuar lëndë narkotike dhe dyshohet se ai ka konsumuar lëndë narkotike në prani të fëmijëve të mitur 6 dhe 11 vjeç. Më pas kur është marrë në pyetje është konstatuar se ai ka qenë nën efektin e lëndëve narkotike, por dyshohet se ky person vuan edhe nga probleme të shëndetit mendor dhe është një person i alkoolizuar”, tha Çelmeta.

LEXONI GJITHASHTU:

• “Baba të lutem më liro, lëshoje armën” – Momentet dramatike nga pengmarrja Durrës
• Theu ‘arrestin e shtëpisë’ në Itali, e shkuara e 40-vjeçarit që mbajti peng fëmijët