Planifikonin sulm terrorist në një treg Krishtlindjeje, 5 të arrestuar në Gjermani

Të paktën 5 persona janë arrestuar në Gjermani nën dyshimin se po planifikonin një sulm ndaj një tregu Krishtlindjeje në afërsi të lokalitetit Dingolfing, në Bavarinë e Ulët.

Sipas një njoftimi të Zyrës së Prokurorit Publik të Mynihut, 4 prej tyre u është caktuar masa e paraburgimit, ndërsa personi i mbetur është në gjendje burgimi.

Megjithatë, mbetet e paqartë se kur do të kryhej sulmi apo se sa konkrete ishin planet e të dyshuarve. Gjithashtu, se cili treg Krishtlindjeje do të sulmohej nuk dihet ende.

Hetuesit dyshojnë se personat e arrestuar ishin të motivuar nga ekstremizmi islamik dhe nga të dhënat paraprake rezulton se ata do ta kryenin sulmin me automjet.

Pas arrestimit, të dyshuarit kanë dalë përpara trupit gjykues. Operacioni ndaj tyre u drejtua nga Agjencia Qendrore Kundër Ekstremizmit dhe Terrorizmit, që funksionon pranë Zyrës së Prokurorit të Përgjithshëm.

Gjithashtu, në operacion u përfshinë edhe shërbimet sekrete të brendshme, të njohura si Zyra Shtetërore për Mbrojtjen e Kushtetutës.

Sipas  autoriteteve, të dyshuarit janë një 56-vjeçar egjiptian, një 37-vjeçar sirian dhe tre marokenë të moshave nga 22 në 30 vjeç.

Nga hetimet është zbuluar se shtetasi egjiptian u kishte bërë thirrje të tjerëve që të organizonin sulmin gjatë një takimi në një xhami.