Planifikonin sulme ndaj objektivave hebraike dhe izraelite, gjykata gjermane dënon me 4-6 vite burg katër burra

Katër burra u dënuan me nga katër deri në gjashtë vjet burg në Berlin të mërkurën për pjesëmarrje në një rrjet që ruanin armë për sulme të mundshme në Evropë, nën drejtimin e grupit militant palestinez Hamas.

Një gjykatë i shpalli fajtorë burrat për anëtarësi në një organizatë terroriste të huaj, duke i dënuar me nga katër deri në gjashtë vjet burg.

Të katërt kishin ndihmuar në ndërtimin e depove të armëve si pjesë e “përgatitjeve për të kryer sulme ndaj objektivave hebraike dhe izraelite në vendet evropiane”, tha gjyqtarja kryesuese Doris Husch.

Ata u identifikuan pjesërisht si Abdelhamid Al A. dhe Ibrahim El R., të dy të lindur në Liban; shtetasi egjiptian Mohammed B; dhe shtetasi holandez Nazih R. Burrat u arrestuan në dhjetor 2023, disa javë pas shpërthimit të luftës Izrael-Hamas në Gaza.

Nazih R. u ndalua në Roterdam, ndërsa tre të tjerët në Berlin.

Në fillim të gjyqit në shkurt 2025, prokurorët i akuzuan ata për “krijimin, mirëmbajtjen dhe çmontimin e strehimoreve të fshehta nëntokësore” ku ruheshin armët.

Ibrahim El R., 43 vjeç, u shpall fajtor për posedim të armëve të paligjshme dhe për anëtarësi në një organizatë terroriste të huaj. Ai mori dënimin më të gjatë, prej gjashtë vitesh burg.

Prokurorët thanë se burrat gjithashtu kishin tentuar të merrnin armë nga një vendndodhje në Poloni, por nuk arritën t’i gjenin, pavarësisht disa përpjekjeve.

Sipas prokurorëve, armët do të përdoreshin për sulme ndaj objektivave si ambasada izraelite në Berlin dhe baza ushtarake amerikane në Ramstein, në perëndim të Gjermanisë.

Ibrahim El R., i cili drejtonte një restorant në Berlin, kishte udhëtuar në Bullgari në vitin 2019 për të varrosur një arkë të mbushur me armë.

Ai gjithashtu kishte sjellë një armë zjarri në Gjermani nga një depo tjetër armësh në Danimarkë në vitin 2019.