Policia gjeorgjiane shpërndan me forcë protestuesit në Tbilisi

Policia gjeorgjiane përdori forcë mëngjesin e 13 majit për të shpërndarë mijëra protestues që zhvilluan protestë paqësore gjatë natës jashtë Parlamentit kundër projektligjit për “agjentët e huaj”.

Më 13 maj, ligjvënësit pritet të debatojnë dhe të votojnë në lexim të tretë – dhe përfundimtar – projektligjin kundërthënës për “agjentët e huaj”, legjislacion që është dënuar nga Shtetet e Bashkuara, Bashkimi Evropian dhe të tjerët, pasi është i ngjashëm me legjislacionin rus.

Videot e incizuara nga Radio Evropa e Lirë tregojnë policë të maskuar duke rrahur një protestues, i cili ishte rrëzuar, para se ta arrestonin.

Për javë të tëra, dhjetëra mijëra persona kanë protestuar kundër projektligjit për “agjentët e huaj” që është prezantuar nga partia në pushtet, Ëndrra Gjeorgjiane.

Projektligji kundërthënës kërkon që organizatat mediale dhe organizatat joqeveritare të regjistrohen tek autoritetet si organizata që “ndjekin interesat e një fuqie të huaj”, nëse ato marrin më shumë se 20 për qind të fondeve të tyre nga jashtë.

Legjislacioni pritet të kalojë në lexim të tretë më 13 maj, teksa Ëndrra Gjeorgjiane ka votat e mjaftueshme që të përmbysë veton e premtuar nga presidentja e Gjeorgjisë, Salome Zurabishvili.

Edhe vitin e kaluar, Gjeorgjia kishte prezantuar një legjislacion të ngjashëm, i cili ishte tërhequr nga Ëndrra Gjeorgjiane pas protestave masive.

LEXONI GJITHASHTU:

• Grupet për të drejtat e njeriut, thirrje Gjeorgjisë që të mbrojë lirinë e shprehjes
• Kryeministri gjeorgjian mbron projektligjin për “agjentët e huaj”