Policia kap pas 10 vitesh arrati vrasësin e dyfishtë në Malësi të Madhe

Policia ka mundur të kapë pas rreth dhjetë vitesh arrati një të dënuar për vrasje të dyfishtë në Malësinë e Madhe. Në momentin e kapjes ai ka kundërshtuar policinë dhe për këtë ka mbetur i plagosur.

Ardian Narkaj, 52 vjeç, i dënuar me 21 vite burg për vrasje, u plagos mëngjesin e sotëm në një zonë të thellë të Malësisë së Madhe gjatë operacionit policor nga Reparti i Neutralizimit të Elementit të Armatosur (RENEA).

Policia njoftoi zyrtarisht në mesditë se e kishte pikasur Narkajn në një stan në zonën malore të fshatit Bratosh dhe pas thirrjeve për t’u dorëzuar ai ka kundërshtuar grupin e RENEA-s duke u përpjekur të largohet.

Në njoftim policia tha se RENEA ka vënë re që Nerkaj ishte i armatosur dhe pas thirrjeve të tjera për të ndaluar ai është qëlluar. 52-vjeçari është dërguar në Spitalin Universitar të Traumave në Tiranë dhe autoritet thonë se ai është në gjendje të stabilizuar.

Narkaj është dënuar me 21 vite burg për vrasjen e Tonin Ulajt dhe Gjergj Shotës në vitin 2008 në fshatin Bratosh të Malësisë së Madhe. Ai ishte ndër më të kërkuarit e policisë.

Në vitin 2011 52 vjeçari qe shpallur i pafajshëm për vrasjen e Ulajt, ndërsa për Shotajn qe dënuar “për vrasje në kapërcim të vetëmbrojtjes”.

Mirëpo në vitin 2015 Gjykata e Lartë e ktheu çështjen për rigjykim dhe një vit më vonë Gjykata e Apelit Shkodër e dënoi atë me 21 vite burg për “vrasje në rrethana cilësuese” dhe “armëmbajtje pa leje”.

LEXONI GJITHASHTU:

• Dy të plagosur në Tiranë, autori kishte muaj në kërkim ndërkombëtar