Policia kufitare e Rinasit i sekuestron 20 mijë paundë të padeklaruara një 43-vjeçari

Policia kufitare e aeroportit të Rinasit ndaloi mbi 20 mijë paundë të padeklaruara nga një 43-vjeçar me inicialet B.M rezident në Elbasan. Paratë (20,240 paundë) atij iu gjetën në çantën e shpinës.

Mosdeklarimi i të hollave dhe sendeve me vlerë në kalimin e pikave kufitare të Shqipërisë dënohet me gjobë ose me burgim deri në dy vite.

Udhëtarët duhet të deklarojnë detyrimisht të hollat dhe sendet me vlerë duke filluar nga shuma 10 mijë euro e sipër.

Në varësi të precedencës, udhëtarët që shkelin këtë rregull gjobiten me 10% të vlerës së shumës së padeklaruar të 10,000-20,000 euro; 20% të shumës nga 20,000-50,000 euro e kështu me radhë.

Sezoni turistik rrit fluksin e hyrje-daljeve në pikat e kufirit, dhe kjo shfrytëzohet shpesh për kalimin edhe të parave në mënyrë të jashtëligjshme duke shmangur deklarimin paraprak të të ardhurave.

Autoritetet dyshojnë se kjo mënyrë përdoret shpesh edhe nga grupet kriminale për të lëvizur shuma të vogla parash.