Policia në duart e ministrit të Brendshëm, Sadedin Fishta: Lëvizje politike, jemi në vit zgjedhjesh

Pak ditë më parë, Komisioni i Ligjeve kaloi nen për nen projektligjin e Policisë së Shtetit. Krahas përgjimeve, një prej ndryshimeve të propozuara është dhe ai i ndryshimit të strukturës së këtij institucioni.

Ministri i Brendshëm Sandër Lleshaj deklaroi se ndarja e strukturave në dy duar, mes ministrit të Brendshëm dhe drejtorit të përgjithshëm të Policisë çon në mos funksionim dhe koordinim të mirë mes palëve.

Ai propozoi që gjithë struktura të kalojë në duart e vetë ministrit, duke i hequr kompetencat Drejtorit të Përgjithshëm. Krahas kësaj, është propozuar heqja e kufizimit kohor 2-vjeçar për rikthimin në komisariate të ish-policëve. Këto ndryshime pritet të votohen në parlament.

Kreu i Sindikatës së Policisë, Sadedin Fishta, tha për Euronews Albania se propozimi i ministrit vjen në një moment kur fillon fushatat dhe është një lëvizje politike që përqendron kompetencat në duart e ministrit të Brendshëm, duke e zhveshur drejtorin e policisë edhe nga ato kompetenca që kishte.

“Ministri i Brendshëm është një funksion politik. Ministri, edhe atë kompetencë që drejtori kishte në lidhje me miratimin e strukturave për nivelin e drejtorive vendore.  Nuk besoj se ka pasur përplasje mes strukturave të ministrit dhe drejtorit të policisë.

Por mendoj se ministri ka menduar ta ketë më shumë nën kontroll policinë  e shtetit duke qenë se jemi në vit elektoral. Drejtorit i mbetet vetëm propozimi për këto struktura, çka do të zgjasë më shumë si procedurë”, tha z. Fishta.

Një barrë tjetër që i vendoset policisë e konsideroi z. Fishta detyrën e re që i është lënë policisë së shtetit për të monitoruar vendosjen e maskave në ambiente të jashtme, teksa shtoi se vendimi i qeverisë duhet të ratifikohet duke u miratuar në Kuvend.

“Vetëm në këtë mënyrë do të ketë zbatueshmëri dhe nuk do të jetë si gjobat e para që fali kryeministri”, tha kreu i Sindikatës së Policisë.