Eksperti i kriminalistikës: Policia asnjë kontroll mbi territorin, lëvizjet e shpeshta e dëmtojnë

Eksperti i kriminalistikës, Arben Hajdarmataj tha në Euronews Albania se mungesa e kontrollit të policisë mbi territorin, me qëllim parandalimin e ngjarjeve kriminale, është arsyeja kryesore e gjendjes së sigurisë në vend.

Në këtë pikë, edhe ndryshimi i shpeshtë i drejtuesve të policisë në qarqe apo edhe në nivele më të ulëta, sipas ekspertit, dëmton punën e policisë pasi çon në shkëputjen e lidhjes së policisë me informacionin në terrenin që mbulon.

Teksa iu referua ngjarjes së ndodhur mbrëmjen e së shtunës në Fier, ku një person u ekzekutua me armë zjarri në një atentat mafioz, z. Hajdarmataj tha se policia duhej minimalisht të kishte evidenca dhe ta mbante në mbikëqyrje këtë person i cili rezulton me konflite të mëparshme.

“Ndryshimet në polici japin efekte pozitive vetëm kur bëhen sipas dinamikës; në një qark apo në një zonë të caktuar sipas performancës. Por, kur ndryshimet bëhen me fushata dhe të sforcuara nga politika kanë efektin e kundërt. Nuk ke pse lëviz një drejtor që ka performancë të mirë vetëm pse ndryshoi kreu i policisë së shtetit. Kjo ka kosto për shkëputjen e lidhjes së policisë me informatorët në terren”, tha eksperti.

LEXONI GJITHASHTU:

• Vritet me armë zjarri biznesmeni në Fier