Një dekadë më parë, vendi ynë mori statusin e kandidatit për anëtarësim në Bashkimin Europian. Në këtë 10-vjecar, ekonomia është luhatur për shkak të krizave të brendshme ose të jashtme të cilat në vitin 2024 reflektojnë rritje të qëndrueshme.

“Pavarësisht sfidave jo të pakta të kësaj periudhe, vëllimi i aktivitetit ekonomik në vend është rritur nga 10 në 24 miliardë euro, niveli i papunësisë është reduktuar nga 17.5% në 10.7%, dhe të ardhurat mesatare vjetore për frymë janë rritur nga 3500 në 9200 euro. Inflacioni ka shënuar një nivel mesatar prej 2.5% gjatë kësaj periudhe, deficiti i llogarisë korrente është ulur nga thuajse 11% në 2% të PBB-së ose mbi 5 herë, borxhi i huaj është reduktuar nga 70% në 44% të PBB-së, ndërsa borxhi publik ka zbritur nga 72% në 56% të PBB-së”, tha Gent Sejko, guvernator i Bankës së Shqipërisë.

Në konferencën me temë, “Roli i bankës qendrore dhe sistemit bankar në rrugën drejt Bashkimit Europian”, edhe ministri i Financave, Petrit Malaj u ndal tek masat fiskale që do të merren për vitet në vazhdim.

“Brenda këtij parashikojmë që të miratojmë strategjinë afatmesme të të ardhurave, për periudhën 2024-27, të cilat kanë si synimin rishikimin e politikave fiskale dhe konvergimin e tyre me politikat e Bashkimit Europian, si dhe përafrimin e legjislacionit për sa i përket politikave të fiskut. Rruga drejt integrimit europian kërkon që politikat fiskale dhe monetare të jenë të harmonizuara”, u shpreh ministri.

Në konferencë, ekspertët e Bankës, Shoqatës së Bankave dhe ata të qeverisë trajtuan qasjet që kas Shqipëria në politikat monetare dhe mundësitë për dixhitalizimin e pagesave në sistemin bankar, të ngjashme me ato në Bashkimin Europian.

LEXONI GJITHASHTU:

• Vlerësim më negativ për situatën ekonomike të vendit sesa të familjes
• Ekonomia amerikane rritet mes fushatës ‘së nxehtë’ presidenciale