Politikë edhe në futboll, Kosova, një fjalë e ndaluar në transmetimin e ndeshjes me Spanjën

Sipas mediave spanjolle, Televizioni Publik i Spanjës, do ta ndërpresë transmetimin në çastin kur himni shtetëror i Kosovës të këndohet në Sevilja para takimit të Grupit B kualifikues për Kupën e Botës mes Spanjës dhe Kosovës.

Sonte në orën 20:45 përfaqësuesja e Spanjës do të përballet me Kosovën në ndeshjen kualifikuese për Botërorin “Katar 2022”. Kjo përballje do të transmetohet direkt në kanalin “La 1” të televizionit publik të Spanjës.

Ishte e përditshmja spanjolle “Marca” që ka raportuar se gjatë transmetimit të ndeshjes, komentatorët e kanë të ndaluar ta përdorin emrin Kosova për shkak se shteti i Spanjës nuk e njeh pavarësinë e Kosovës.

Gazeta sportive ka shkruar se televizioni publik i Spanjës gjithashtu është dashur të bëjë disa modifikime në mënyrë që gjatë ndeshjes t’i referohet emrit të Kosovës si “Federata e Futbollit të Kosovës”.

Bazuar në këtë, ka informacione se ky televizion nuk do të transmetojë as momentin kur do të hapet flamuri i Kosovës dhe të këndohet himni para ndeshjes që do të luhet në Sevilja.