Polonia kërkon ndërhyrjen e diplomatit bjellorus pas ‘provokimit’ në kufi

Ministria e Jashtme e Polonisë tha se ka kërkuar ndërhyrjen e një diplomat bjellorus në kufirin e vendit.

Polonia thotë se “individë të paidentifikuar me uniformë dhe të armatosur” kaluan në territorin e saj mbrëmjen e së hënës.

Ministria e Jashtme e ka përshkruar incidentin si një “provokim” dhe tha se kishte thirrur të ngarkuarin me punë të Bjellorusisë, Alexander Chesnovsky.

Incidenti vjen pasi Polonia përballet me presion të konsiderueshëm të migracionit në kufirin e saj lindor me Bjellorusinë.

Stanislaw Zaryn, një zëdhënës i shërbimeve të sigurisë së Polonisë, tha se incidenti ishte “më i rrezikshmi dhe më i rëndi deri më tani”.

“Pas takimit me një patrullë polake, ata ringarkuan armët e tyre dhe më pas u nisën drejt Bjellorusisë,” – tha Zaryn.

“Incidenti ka ndodhur rreth 300 metra nga kufiri me Bjellorusinë,” – shtoi ai.

Zëvendësministri i Jashtëm i Polonisë, Piotr Wawrzyk, ka kërkuar një shpjegim dhe ka thënë se zyrtarët bjellorusë rrezikojnë të përshkallëzojnë tensionet.

“Veprimet e ndërmarra nga autoritetet bjelloruse në javët e fundit kanë shenjat gjithnjë e më të dukshme të një përshkallëzimi të qëllimshëm,” – tha ai në një deklaratë.

“Polonia i konsideron veprime të tilla të papranueshme dhe nuk do t’i tolerojë ato. Polonia është e vendosur të mbrojë kufijtë e saj dhe kufijtë e jashtëm të Bashkimit Europian,” – shtoi Wawrzyk.

Në muajt e fundit, mijëra emigrantë nga Siria, Iraku, Afganistani dhe Afrika kanë hyrë në Poloni dhe vende të tjera anëtare të BE-së, shumë prej të cilëve mbanin viza turistike bjelloruse.

Bashkimi Evropian ka akuzuar Minskun për inkurajimin e qëllimshëm të migracionit të paligjshëm në shenjë hakmarrjeje ndaj sanksioneve të BE-së, në një përpjekje për të destabilizuar bllokun.

Një numër imigrantësh dhe refugjatësh mbeten të bllokuar mes dy kufijve në kushtet gjithnjë e më të vështira të motit të vjeshtës.

Të paktën dhjetë persona kanë vdekur deri më tani në rajon, duke përfshirë një emigrant irakian i gjetur në anën polake të kufirit të premten.

LEXONI GJITHASHTU: 

• Vijon kriza e emigrantëve në kufirin Poloni-Bjellorusi, lëndohen dy ushtarë
• BE gjobit Poloninë, Varshava do paguajë 1 milion euro në ditë për shkelje të ligjit
• Parlamenti miraton murin kundër emigrantëve në Poloni