Polonia s’heq dorë nga dëmshpërblimet e luftës: Gjermania dikur si Rusia sot

Kryeministri polak Mateusz Morawiecki, në një intervistë për të përditshmen gjermane “Bild”, përsëriti kërkesën e Varshavës për dëmshpërblime të luftës nga Gjermania, për shkak të shkatërrimeve gjatë Luftës së Dytë Botërore.

Në intervistë, Morawiecki e krahasoi Gjermaninë e dikurshme me Rusinë e sotme dhe agresionin e saj kundër Ukrainës.

“Mirëqenia, pasuria juaj, të paktën pjesërisht, bazohet në vjedhjen e shtëpive, fabrikave, pronave polake. Paraardhësit tuaj janë përgjegjës për ato krime të së kaluarës”, i tha Morawiecki brezit të pasluftës në Gjermani.

Ai shtoi se pasardhësit duhet ta marrin atë përgjegjësi, sepse nëse kjo nuk bëhet, atëherë nuk do të jetë e mundur të kërkohet përgjegjësi nga Rusia për krimet që ushtria e Putinit po i kryen në Ukrainë.

“Kjo është arsyeja pse unë pyes gjermanët: a dëshironi që Rusia të kalojë pa ndëshkim, pa kompensim për fqinjët e saj pas kësaj lufte? Unë mendoj se shumica e gjermanëve nuk e duan këtë”, tha kryeministri polak.

Ai u kërkoi gjermanëve të marrin përgjegjësinë për krimet dhe vrasjet masive të kryera në Poloni gjatë Luftës së Dytë Botërore.

LEXONI GJITHASHTU:

• Dëmshpërblim për dëmet e luftës, Polonia kërkon Izraelin në negociatat me Gjermaninë
• Polonia i kërkon Gjermanisë 1,3 trilionë euro dëmshpërblim për dëmet e luftës