Porsche regjistron 3.9 miliardë euro shpenzime, fitimi bie ndjeshëm në 2025

Prodhuesi gjerman i makinave luksoze, Porsche AG, ka regjistruar rreth 3.9 miliardë euro shpenzime të jashtëzakonshme gjatë vitit 2025, duke shkaktuar një rënie drastike të fitimit operativ të kompanisë.

Sipas prezantimit të publikuar për analistët dhe investitorët, këto shpenzime ulën fitimin operativ të grupit me rreth 92.7%, nga 5.6 miliardë euro në vetëm 413 milionë euro. Vetëm divizioni i automobilave pa një rënie edhe më të madhe, me fitimin operativ që ra me 98.3%, nga 5.3 miliardë euro në 90 milionë euro.

Pjesa më e madhe e shpenzimeve, rreth 2.4 miliardë euro, lidhet me riorganizimin e strategjisë së produkteve. Rreth 700 milionë euro të tjera lidhen me aktivitetet në sektorin e baterive, ndërsa një shumë e ngjashme është atribuua­r tarifave tregtare në Shtetet e Bashkuara.

Një komponent i rëndësishëm i këtyre shpenzimeve është zhvlerësimi i të ashtuquajturit “goodwill”, që përfaqëson vlerën e markës dhe potencialin e fitimeve të ardhshme të kompanisë në bilancet e saj.

Vendimi për të rishikuar strategjinë vjen në një moment kur tregu i automjeteve elektrike po përballet me sfida të reja. Modeli elektrik kryesor i kompanisë, Porsche Taycan, regjistroi një rënie prej 22% të dërgesave gjatë vitit 2025.

Dobësimi i performancës së Porsche ka ndikuar edhe në kompaninë mëmë, Volkswagen Group, e cila raportoi një rënie prej 44% të fitimit neto në vitin 2025, në 6.9 miliardë euro. Grupi ka paralajmëruar gjithashtu plane për të reduktuar rreth 50 mijë vende pune në Gjermani deri në vitin 2030.

Vetë Porsche pritet të shkurtojë rreth 3,900 vende pune, përfshirë edhe stafin e përkohshëm, ndërsa kompania përpiqet të përshtatet me ndryshimet e tregut global të automobilave.