Pranga krerëve të policisë në Brazil, neglizhuan rrezikun e protestave

Autoritetet në Brazil kanë urdhëruar arrestimin e zyrtarëve më të lartë të shtetit pas kryengritjes që vuri në shënjestër godinat qeveritare në kryeqytetin Brazilia.

Në pranga kanë përfunduar komandanti i policisë ushtarake, shefi i rendit publik dhe zyrtarë të tjerë përgjegjës për lejimin e trazirave.

Zyrtarët në fjalë janë shkarkuar nga detyra, por nga ana e tyre ata mohojnë akuzat për përfshirje dhe nxitje të mbështetësve të ish-presidentit ekstremist, Bolsonaro.

Kryengritja ndodhi një javë pas betimit të presidentit të ri të vendit, Lula da Silva. Në të morën pjesë disa mijëra protestues, që mbanin të veshur fanellën e kombëtares braziliane të futbollit dhe që me flamuj në duar plaçkitën godinat kryesore të shtetit brazilian.

Nga rreth 1.500 të arrestuarit, të cilët u dërguan të prangosur në akademinë e policisë, autoritetet thonë se rreth 600 janë dërguar në komplekse të tjera. Tani, zyrtarët policorë kanë 5 ditë kohë për të ngritur akuzat ndaj tyre.

Një prokuror federal akuzoi shefin e rendit publik për një “operacion sabotimi të strukturuar”. Sipas hetuesit, ka pasur një neglizhencë nga krerët e policisë për të ndalur turmat teksa bëheshin gati të sulmonin ndërtesat qeveritare.

Gjithashtu, prokurorët kanë kërkuar një kryerjen e një auditimi federal për të ngrirë asetet e ish-presidentit Bolsonaro.

Ish-kreu i shtetit, që i ka dënuar manifestimet, nuk ka pranuar humbjen në zgjedhjet e tetorit, të cilat përçanë vendin.

Të hënën ai u shtrua në një spital në Florida për shkak të dhimbjeve në bark, si pasojë e një agresioni me thikë gjatë fushatës zgjedhore të vitit 2018. Ai doli nga spitali ditën e martë.

LEXONI GJITHASHTU:

• Tubime të mëdha pro-demokracisë në Brazil
• Trazirat në Brazil, Bolsonaro shtrohet në spital