Prefekti i Vlorës padit në polici të gjithë pronarët e kullotave në malin e Karaburunit

Prefekti i Vlorës Flamur Mamaj deklaroi në Euronews Albania se ka paditur në polici të gjithë ata që zotërojnë kullota në malin e Karaburunit. Sipas tij, gjithkush duhet të japë llogari për situatën problematike të zjarreve.

Rreth orës 10:20 ushtria ka mbërritur në vendngjarje dhe puna pritet që të mbarojë rreth orëve të pasdites. Mamaj theksoi se terreni i thepisur e bën punën shumë më të vështirë.

Ndërkohë sipas prefektit të Vlorës, nga Forcat e Administratës së Zonave të Mbrojtura është punuar gjatë gjithë natës dhe është shuar zjarri në 900 metra, vijë lineare në malin e Karaburunit dhe është shuar gjithashtu një vatër në pyll në pikën më të lartë të Karaburunit, që pjesërisht është aktivizuar edhe sot.

Ende nuk ka një shifër të sipërfaqes së djegur, që kryesisht janë shkurre dhe kullota, ndërsa Memaj theksoi se Dukati, Tragjasi dhe Kuçi janë zonat më problematike.

LEXONI GJITHASHTU: 

• Zjarr masiv në Karaburun, kërkohet ndërhyrja e ushtrisë
• Zjarr pranë Gjirit të Hartës në Ksamil
• Zjarrfikësit në Shkodër, të paktë në numër përballë temperaturave të larta